فين هيبة شيوخ و علماء المسلمين؟؟؟

فين هيبة شيوخ و علماء المسلمين؟

راحت فين الهيبة دي؟ فاكرين زمان كانت الناس بتعمل ايه لما يشوفوا شيخ؟ كانت الناس تقول عليه راجل بركه , كلمته مسموعة بين كل الناس بدون نقاش. كانت الناس لما تختلف تحكم شيخ, و يحترموا حكمه جدا. طب ليه دلوقتي ده مش موجود؟ ليه الناس بقى الشيخ ده بالنسبه ليهم إنسان عادي زي كل الناس؟

زمان لما كان شيخ يعدي في الشارع كان اللي بيعمل حاجة غلط يستخبى (إحترام بقى) حاليا ده مش بيحصل, عادي الشيخ يعدي و اللي بيشتم يكمل شتيمة و اللي بيدخن عادي بردو مفيش اي مشاكل. مع ان المسيحيين غير كده خالص!!! مش عارفة ليه منتعلمش منهم الحكاية دي مع اننا مش محتاجين ده احنا أمة علمت العالم كله معنى كلمه إحترام ب للأسف فقدناها!!!

فين أيام زمان لما كانت كلمه الشيخ ابن عبد السلام تمشي على رقبه الحاكم, دلوقتي حتى مبتمشيش على رقبه الناس العادية!!!

اشمعنى لما يطلع واحد يفسر الاحلام و هو ولا شيخ شيخ ولا حاجة الناس تقول عليه ده بركة و تمشي وراه و تحترمه جدا؟ و لما يطلع واحد من اياهم بردو و يحلل الحرام و يحرم الحلال بردو الناس تمشي وراه!!!!

هي الآيه اتقلبت؟ هي ليه الناس بقت بتسمع كلام اللي يقول الغلط و الصح لأ؟

دول الشيعة اللي بتتريقوا عليهم لما الشيخ يقول اي حاجة عندهم تنفذ بلا تفكير!!! امال احنا كده ليه؟

اشمعني اخوانا دول اللي في غزة نازلين دبح في بعض و الشيوخ كلها تنادي يا جماعة حرام اللي بتعملوه و دول محدش مالي عينهم

هو حصل ايه؟ ايه اللي جرى؟
حد فاهم حاجة؟
لأ
ولا أنا

كل اللي انا فاهماه ان لما أمة تبقى بالمنظر ده يبقى مش حرام اللي بيحصل فيها

السؤال المهم: مين السبب في ده؟

هل دي بقه سمه العصر ان محدش بقى يحترم حد؟ ولا ليها اسباب تانية؟!!!!!!

مش عارفة يا ريت حد يقوللي