Odesk

The On Demand Global Workforce - oDesk

Thursday, October 9, 2008

الصداقة والمصلحة الشخصية

قصدي هنا بالمصلحة الشخصية مش اني اصاحب واحد عشان هاخد منه مصلحة او هينفعني بحاجة بس قصدي هنا مصلحتي انا مع الناس يعني انفع استمر معاهم واحقق في نفس الوقت اللي انا عاوزه ولا لا
تفتكروا لو كل واحد ساب الباقي عشان هو ربنا مثلا منَ عليه او اكرمه مثلا بعلم او بحماس او بطاقة زيادة عن الباقي او خلافه تفتكروا ان الدنيا كانت مشيت؟
الناس ليه يا جماعة مبقاش عندها صبر علي حاجة ؟؟؟؟ ودايما بيحطوا الناس اللي قدامهم في موضع الاختبار واول ما يقعوا يبقي عليه العوض
يبقي كده الناس دي متنفعش واشوف انا مصلحتي مع ناس غيرهم
ليه الناس مش بتبص دايما انهم هما اللي مقصرين؟ ليه احنا دايما بنبص علي غيرنا؟ ما نبص علي نفسنا الاول؟؟
يا جماعة بالله عليكم، في حد كامل؟؟!!!! الكمال لله الخالق القهار وحده ما اصل لو كل واحد بقي كامل يبقي مفيش حد هيحتاج لحد وكل واحد بقي ماشي في الدنيا ديه لوحده وربنا مخلقش الدنيا دي كده هباءً يعني ولا ربنا خلق كل الامم دي عشان كل واحد يعيش حياته مع نفسه وملهوش دعوة بالناس التانية.
ليه احنا مبقاش عندنا حسن ظن في الناس؟ ليه مش بقينا قادرين نصبر علي بعض؟ ليه منحاولش نطلع من الناس احسن اللي فيهم؟ مفيش بني آدم ربنا خلقه كله شر بس ولا كله خير بس، ليه منحاولش نخرج احسن اللي في الناس
يا جماعة بجد الناس جواها حاجات كتير اوي كويسة، صحيح ان معظمنا مبيقدرش يخرج كل الكويس اللي جواه ومحتاج حد يساعده بس ده مش معناه ان ده مش هينفع يكمل معانا. لازم نجعل مهمتنا في الحياة ان احنا نساعد بعض، امال ازاي عاوزين نبقي احسن الناس واحسن الامم وخير أمة اخرجت للناس ، منين الكلام ده كله؟؟ عمره ما في واحد هيبقي قائم بذاته ولو كل واحد قال ان اللي معايا دول هيوقعوني وانا لو فضلت اساعد فيهم هيضيعوني يبقي كلنا مش هننفع او واحد بس فينا اللي هينفع والباقي هيجيله حالة احباط، ما هم مش نافعين بقي وصحابهم سابوهم يبقي هيشتغلوا ليه ؟؟ هيجيلهم حالة احباط وخلاص ما هي كلها محصلة بعضها.
يا جماعة والله مينفعش الكلام اللي بيحصل ده، دي مش اخلاق الرسول صلي الله عليه وعلي آله وصحبه وسلم تسليما كثيرا ولا اخلاص الصحابة رضوان الله عليهم
اصل لو كان الموضوع كده مكانش بقي في دعوة ولا كان الاسلام انتشر، الرسول عليه الصلاة والسلام كان بيدعو كفار، الناس عارفة يعني ايه كفاااااااااااااااااااااااااااااااااااار، اشد الناس عداوة للرسول ولدين الله يا جماعة، لو كان الرسول ساب الناس وقال انهم كفار ومش هييجي منهم مكانش حد أسلم. لكن الرسول عليه الصلاة والسلام كان عارف ان الناس برضه في جواها خير مع انهم برضه في العصر الجاهلي وكان بيؤودوا البنات لكن ما زال جواهم خير.
ليه احنا مش عاوزين نتصف بصفات الرسول عليه الصلاة والسلام واللي يعمل كده يبقي مجنون او مش بيفكر في مصلحته
يا جماعة انا مش قصدي ان احنا نضيع نفسنا بس لو انت حاسس ان الناس جواها خير ليه متشجعهاش انهم يطلعوا اللي جواهم ده. لكن لو هما اصلا مش فارقة معاهم وزي ما تيجي تيجي واديتهم فرصة مرة واتنين وتلاتة يبقي كده ليك حق تعمل اللي انت عاوزه لكن مادام الناس كويسة انا شايف بصراحة ان المفروض نساعدهم يبقوا احسن علي الاقل يتكتب في ميزان حسناتنا بدل ما ميزان سيئاتنا اللي عمل بيزيد كل لحظة ده. يا جماعة المفروض نعمل حاجة الناس تفتكرنا بيها او تتكتب في كتابنا ان احنا عملنا حاجة او علمنا الناس حاجة حتي لو مبدأ كويس يمشوا بيه في حياتهم. مش كل واحد ربنا اداه علم بس كل واحد ربنا اداه حاجات اعتقد في رأيي انه ممكن يعلمها للناس حتي لو كانت اخلاق ومعاملات حتي لو كانت قيم او حاجات معنوية تتحس بس ممكن تنفعهم في حياتهم او لو افتكرونا في يوم من الايام يقولوا اه والله ده كان انسان كويس ربنا يباركله مسابناش وقت ما كنا محتاجينله ووقف جنبنا وحاول معانا بأقصي طاقاته انه يخلينا نوصل لأحسن حال وليكن ده كله لله يا جماعة منساش النية واختم بهذه الابيات
فادركت الفرق بين فرحة النجاح ومرارة الفشل
وكذلك قسوة القرارات فى وقت الالم وتسرعها
وإياى والندم على ما فعلت لأجل من احبهم
,سوف يتذكروننى وقت لا يجدون من يضحى من اجلهم
وسيذكرون ايامى بالخير دوما
هذه الابيات مقتبسة للأمانة وبجد بحب اشكر كل المدونين اللي معايا دكتورة نيو ودكتور مسلم وبجد مش لاقي كلام اقولهلوكوا مواضيعكوا كلها بجد قيَمة وربنا يكرمكوا يا رب