عن احداث الخصوص والكاتدرائية اتحدث....

تنويه: البوست ده مش هيعجب اي حد بيناصر الاهل والعشيرة (على اختلاف مفهوم الاهل والعشيرة عند كل واحد) فأي حد مقتنع ان جماعته هي اللي على حق ومبتغلطش ابدا ميقراش البوست احسن عشان لا يصدع نفسه ولا يصدعني لأني معنديش اهل وعشيره اناصرهم بصراحة انا بناصر الحق

تنوية 2: الكل متغلط هنا فاللي مش عايز يشوف ناسه غلطاتين ميقراش البوست بردو

تنوية 3: البوسط تجميعة من ردودي على ناس فاللغه ممكن تحس انها موجهة لحد انت مش عارفه مش مشكلة طنش المهم المعنى يوصل

عن الخناقة اللي حاصلة في الخصوص ومن بعدها الكاتدرائية اتحدث.....

انا قريت الخبر من عالشروق, وبما انه مصدري الوحيد للقصة اللي وقعت بسببها الاحداث فانا هتكلم على اساس رواية الشروق, شوية عيال بيرسموا صلبان على حيطة معهد ازهري, واحد بيزعقلهم, شاب يزعق للي بيزعقلهم وتقلب بخناقة بسلاح!!!

ماذا تتوقع بعد ذلك؟ الغضب بيعمي والهبل كله يطلع, اللي نفسي افهمه, البلد دي مفيهاش حد عاقل يجيب الزفت اللي افتعمل كل ده من الاول وشوية العيال اللي عملوا كده ويديهم على دماغهم عشان تهدى الامور؟!!!! طيب لو البلد مفيهاش عاقلين دور الشرطة فين؟ متقبضش عليهم ونخلص ونقفل عالموضوع ليه؟ وينجر وراهم طبعا كل من شال سلاح وقتل بيه حد من اي طرف.

زي مامرضاش ان المسلمين يصوتوا لما يبدأوا بالاعتداء مقبلش بردو ان المسيحيين يصوتوا لما يبتدوا بالاعتداء, مينفعش احاسب واحد على رد فعل واسيب اللي ابتدى الفعل, وكالعاده لو الموضوع تم التدخل فيه من الاول من قبل الدولة - اللي ملهاش وجود اصلا - مكناش وصلنا لكده!!

http://www.shorouknews.com/news/view.aspx?cdate=06042013&id=0c9f0256-abf8-40ba-bfda-93a270757e15#.UWAIEiFJwxk.facebook

وتم تأكيد الخبر فعلا بعدين وفي الخناقة دي قتل شاب مسلم وبعدها 4 شباب مسيحيين وبعدين اتحرقت واجهة كنيسة وكانوا عايزين يولعوا في واحده كمان بس الامن صحي وتصدالهم!!!!! فكرة حرق كنيسة او مسجد مينفعش, مش عشان شوية ناس من ديانه معينة غلطوا يعاقب باقي الناس اللي من نفس الديانة, حل الموضوع ده ايه؟ محاسبة كل من اخطأ من الطرفين, كل فعل بيبقى ليه رد فعل مينفعش يبقى اقوى لأن كده اسمه استخدام مفرط للقوة طبعا الناس مش هتفهم ده لنهم مشافوش حد في البلد كلها فاهمه اول من بيستخدم الافراض في القوة وبيبلطج عالشعب هي الدخليه المنوطة بحماية الشعب!!!! فالحل ان كل واحد غلط من كل الاطراف وبالذات اللي ابتدى الموضوع يحاسب حساب رادع وكل اللي حصل قبل كده يتحاسب اللي عمله مش كل مرة نقعد قاعده عرب وبوسوا واحضنوا بعض يا ولاد وتحيا الهلال مع الصليب وخلصنا!! لأ مبنخلصش واللي في القلب في القلب وكل طرف بيحاول ينتقم بنفس طريقة غلط الاول فيه ومش هنخلص!!!

نيجي للكاتدرائية بقى:

الاقباط حبوا يولولوا كالعاده ويعملوا انهم مظلومين ياعيني ومعملوش حاجة!!! مع انهم عملوا actually ومفيش حاجة اسمها تدافع عن واحد اجرم لنه من دينك او من اهلك او عشيرتك والا تبقى شاركته الجرم ومتشتكيش بعد كده اه موضوع حرق الكنيسة مينفعش بس وقفتكوا مع العيال اللي غلطت وتطور الموضوع لاستخدام سلاح مش صح, مبحبش اوزع صكوك الشهاده بس ربنا يرحم ويسامح اللي ماتوا عاللي عملوه, التعصب الاعمى هيودي البلد كلها في داهية, المهم الشرطة كالعاده مؤخرا بقى عندنا هواية تضرب الجنازات, ناس غضبانة وعاملة حسابها تطلع عالاتحاديه وفي نفس الوقت الحزب الحاكم يخطط لفتح ملف ميليشيات الكنائس اللي معليهوش اي دليل!!! واللي عنده يطلعه ويخلصنا والشرطة والنيابة يفتشوا المكان اللي عليه دليل ولو في فعلا يحاسب اللي شايل سلاح ونخلص مفيش حد فوق القانون – ده المفروض يعني ده لو في دولة بتطبق قانون على حد من الاساس- المهم اتعمل الفيلم الهندي ده عشان يضرب كذا عصفور بحجر واحد نأدب المسيحيين على وقفتهم مع الازهر عدو الاخوان لنه مش عايز يمرر قانون الصكوك, نعمل اللي احنا عايزينه كحزب حاكم مع المسيحيين خصومنا السياسيين ونخلي الناس تكرههم ونقول ملييات وكده, نلعب بملف الفتنة الطائفية – بص العصفورة – عشان نلهي الناس شوية عن خيبتنا في ادارة البلد – زي اي نظام فاشل في الدنيا – ودي خطة متجربة من ايام السادات وهتنفع اكيد طبعا اعلام الاخوان حاول بكل الطرق تزوير اللي حصل لدرجة انهم استخدموا صور الناس اللي بتضرب عالكاتدرائية عشان يقولوا انها ميليشيات الكنيسة بتضرب عالامن!!! مستغلين جهل الناس بجغرافيا المنطقة

6- فيديو يوضح ضرب النار من أسطح الكاتدرائية

http://www.youtube.com/watch?v=zL-BO_X5EmE

_________________________________

ده مش سطح الكاتدرائية ده سطح مبنى ورا البنزينة اللي جنب الكاتدرائية وكل الضرب موجه ناحية الكاتدرائية مش العكس

الصور دي توضح الضرب جاي منين, مستشفى الدمرداش جنب الكاتدرائية فانا حافظة المكان ده كويس

https://www.facebook.com/photo.php?fbid=10151586870966133&set=a.10150404236006133.413610.655501132&type=1&relevant_count=1

https://www.facebook.com/photo.php?fbid=10151586850036133&set=a.10150404236006133.413610.655501132&type=1&relevant_count=1

https://www.facebook.com/photo.php?fbid=10151339616701646&set=a.476932851645.259834.704291645&type=1&relevant_count=1

فيديو اشعال السيارة مقدرش اعلق عليه لأنه متقطع من سياق اكبر بس بما ان الشرطة واقفة مقبضتش على اللي ولع في العربية ليه؟!! سؤال يطرح نفسه, وافتكر الفيديوهات اللي قطعوها لينا في الجمعية العمومية وكتبوا عليها بلطجية اليسار وبلا حقوق واللي حصل معاك امبارح وانت تعرف اخلاق اللي بيقصقص الفيديوهات وبيلفق تهم

http://www.youtube.com/watch?v=zL-BO_X5EmE

اشتباكات الكاتدرائية عن قرب الفيديو ده يدين الامن اللي واقف عند البنزينة اللي البلطجية فوقها بيضربوا عالكاتدرائية مش العكس يعني بهايم ومش عارفين يزوروا كمان معتمدين ان الناس متعرفش جغرافيا المكان كويس

http://www.almasryalyoum.com/node/1627001 نفس الحكاية دي الناس اللي بتضرب في اتجاه الكاتدرائية من المبنة اللي ورا البنزينة مش العكس

واللي بعد كده ميستاهلش اني ارد عليه لأنهم كانوا عارفين ان الناس بعد الجنازة هتطلع عالاتحادية فمين من مصلحته منعهم؟ مين اللي بيستفزه اوي كلمة يسقط حكم المرشد؟ اللي حصل في الخصوص قلة ادب من المسيحيين بس بردو حرق واجهة كنيسة هناك قلة ادب من المسلمين مش عشان كام مسيحي غلطوا يتعاقب المسيحيين كلهم.

اما بقى عالهتافات فافتكر "جايين الليلة نقفلهالكم" هل كنا بنقفلها فعلا ولا مجرد هتاف يخوفهم؟ دي زي دي بالظبط مع اني اتوقع لو استمر مسلسل حرق الكنائس ده كتير بدون اي عقوبة لمين المخطئ انهم هيتسلحوا وياخدوا حقهم بايديهم زي اي حد في مصر فقد الثقة في الدولة تجيبله حقه فبيدور عليه بنفسه.

واخيرا, اخوان كاذبون ملفقون مزورون, وافتكر دايما ان النظام داخل بنفرين في اي معركة, هما في الاول قالوا مجهولين لما الناس فضحتهم ونزلت صور الشرطة وهي بتحمي اللي بيضرب عالبلطجية استغلوا جهل الناس بجغرافيا المكان وصور الكاتدرائية الممتد عشان يفصل بين الكاتدرائية والبنزينة وعكسوا اللي حصل تماما وصوروا للناس ان الكاتدرائية اللي بتضرب مش العكس!!! وبعدين قالك اصلهم استفزوا الامن والناس راحت تربيهم, من امتى اي مظاهرة بتحصل الامن مبيخليش الناس تشيط وتبهدله ومن امتى المصريين بيقفوا مع الامن؟!!!

افتكر اللي حصل امبارح لحركة احرار في المنصورة وان تعرف ايه اللي حصل يوم الجمعة هناك

عن اي إسلام تتحدثون؟!

لما يبقى في مسلمين مؤمنين ومصدقين في فتاوي البعض باجازة قتل العزل والمؤمنين على حياتهم في بعض الاحيان, يبقى مينفعش الوم الغرب على وصف المسلمين بالارهابيين

اصلحوا مافسد عندكم ايها المسلمون ليصلح اعدائكم نظرته اليكم

ابْنُ عُمَرَ عَنْ أَبِي بَكْرٍ رَضِيَ اللَّهُ عَنْهُمَا ... قَالَ : ثُمَّ بَدَا لَهُ فِي الانْصِرَافِ إِلَى الْمَدِينَةِ , فَقَامَ فِي الْجَيْشِ ، فَقَالَ : قَالَ رسول الله صلى الله عليه وسلم : ثُمَّ بَدَا لَهُ فِي الانْصِرَافِ إِلَى الْمَدِينَةِ , فَقَامَ فِي الْجَيْشِ ، فَقَالَ : " أُوصِيكُمْ بِتَقْوَى اللَّهِ لا تَعْصُوا , وَلا تَغُلُّوا , وَلا تَجْبُنُوا , وَلا تُغْرِقُوا نَخْلا , وَلا تَحْرِقُوا زَرْعًا , وَلا تَحْبِسُوا بَهِيمَةً , وَلا تَقْطَعُوا شَجَرَةً مُثْمِرَةً , وَلا تَقْتُلُوا شَيْخًا كَبِيرًا , وَلا صَبِيًّا صَغِيرًا , وَسَتَجِدُونَ أَقْوَامًا حَبَسُوا أَنْفُسَهُمْ لِلَّذِي حَبَسُوهَا ، فَذَرُوهُمْ وَمَا حَبَسُوا أَنْفُسَهُمْ لَهُ , وَسَتَجِدُونَ أَقْوَامًا قَدِ اتَّخَذَتِ الشَّيَاطِينُ أَوْسَاطَ رُءُوسِهِمْ أَفْحَاصًا ، فَاضْرِبُوا أَعْنَاقَهُمْ , وَسَتَرِدُونَ بَلَدًا يَغْدُو عَلَيْكُمْ وَيَرُوحُ فِيهِ الطَّعَامُ وَالأَلْوَانُ , فَلا يَأْتِيَنَّكُمْ لَوْنٌ إِلا ذَكَرْتُمُ اسْمَ اللَّهِ عَلَيْهِ , وَلا يُرْفَعُ لَوْنٌ إِلا حَمَدْتُمُ اللَّهَ عَزَّ وَجَلَّ " .

وفي حديث آخر: عن عبد الله بن عمرو رضي الله عنهما قال : قال رسول الله صلى الله عليه وسلم : " من قتل معاهدا لم يرح رائحة الجنة ; وإن ريحها توجد من مسيرة أربعين خريفا " . رواه البخاري . 

المعاهد يعني اي حد امن دخول بلدك, يعني السياح والدبلوماسيين والعاملين والمقيمين

يعني حتى لو بلدك في حرب مع بلد تانية مينفعش تقتل مواطنيها اللي عندك ولا دبلوماسييها, ووانت بتحاربهم مينفعش تقتل مواطنيهم العزل ولا الاطفال ولا النساء والشيوخ ومتعتديش حتى على شجرة ولا عابد في صومعه

كل ده والاحاديث الصريحة دي وناس تقولك اصل في فتاوي بتجيز قتل المعاهدين في بعض الظروف

اي اسلام عنه تتحدثون؟

ارحمونا يرحمكم الله

والسلام ختام

شعب يصنع الطواغيط بامتياز!!

لو الناس سكتت؟ هنرتاح, على الاقل اللي عايز يفهم هيفهم في هدوء بدون كل اللغط الموجود

مشكلتنا في مصر اننا لما بنحب نعرف حاجة بنخاف نروح لمصدرها الاصلي لحسن نقتنع بيها؟ بنخاف يتم اضلالنا على اساس اننا خرفان مثلا بتساق ومعندهاش عقل تميز, متربيناش نفكر, احنا اتربينا ان في منهج دراسي بيجبلنا المعلومة لحد عندنا ومينفعش نطلع بره المنهج ده, كل شئ بره المنهج فهو غلط وضلال بيّن!!

لما حبيت اعرف ايه هي البهائية جبت كتب البهائيين وقريتها مجبتش رأي شيوخ الاسلام في البهائية ومضلتش ومبقتش بهائية ولا حاجة وفضلت مسلمة زي ما انا بالعكس زاد ايماني وقناعتي بديني اكتر, عشان فكرت وعرفت اميز بين الصح والغلط, الناس في مصر بتخاف تفكر فدايما بتلجأ للي يفكرلها, تخيل انتي حد حطك في مكانه عاليه انك تفكر ليه وتاخد القرار وهو ينفذ بدون اي وجه اعتراض, تبقى عبيط لو مستغلتيش ده ماهو النفس امارة بالسوء بردو, احنا شعب يصنع الطواغيط في كل شئ وبامتياز. عايز ايه اكتر من ناس بتسلم عقلها لغيرها عشان يفكرلها؟ هيطلع كويس يعني ويقولهم لأ والنبي خدوا عقلكم انتو بنى ادمين!!! اكيد لأ!! 

اللي يتنازل عن ادميته وعقله اللي ربنا ميزو بيه ميتوقعش ان في حد هييجي يرجعهالوا تاني وهيفضل طول عمرو زي الخروف يساق!!

مقاطعون

مرسي مش هيحاسب حد بلاش نضحك على نفسنا, مرسي هيخاف على كراسي البرلمان ويبقى شوخشيخة في ايد العسكر وهيتعمل لهم الدستور اللي هما عايزينو ومحدش هيتحاسب.

الفرق الوحيد بين شفيق ومرسي ان مش هنتحط كلنا في السجون ولا هنندبح في الشوارع.

الاخوان يتخلوا عن الغطرسة بتاعتهم عشان نقف جنبهم لنهم مخلوش ليهم رصيد عند حد مسابوش حد الا وباعوه, معملوش لأخرتهم ولو معملولهاش دلوقتي يبقى ميستاهلوش مش هدي صوتي لشفيق بس هقاطع ومش نازلة خالص لن فعليا ميستاهلوش لو فضلوا زي ماهما. الاخوان مش المنقذ.

هقاطع عشان ده فل وده متغطرس والاتنين هيحبسوا حريتي ومش هعرف اعارضهم, اللي عايزني انتخبوا يديني ضمانه بحريتي.

من كام يوم قلت اقاطع او انتخب خالد على لن غطرسة ابو الفتوح وصباحي هتضيعنا وميستاهلوش صوتي وطلعت صح وغطرستهم فتّت الاصوات فعلا, مش هغلط نفس الغلطة مرتين المتغطرس مش هياخد صوتي.

دي مش سلبية ده عقاب للمتغطرس, انت محتاج صوتي وتكبرت انا بقى هعاقبك ومش هطولهولك لأني مبيتلويش دراعي وتعالى بقى شرف جنبي عشان تعرف ان الله حق.

الاخوان ملهمش امان وبمجرد ما هتخلص حاجتهم مننا هيرمونا ومش بعيد للعسكر, لو مش هيديني ضمانه انو هيخوني يبقى انا وهو بقى مش هيتسلق على جثتي.
ده نوع من الضغط, هما متغطرسين عشان مقتنعين اننا ملناس غيرهم والحقيقة انهم ملهمش غيرنا لو خليناهم يعرفوا الحقيقة دي هيحترموا نفسهم ويبطلوا غطرسة

:وعلى رأي كلمة قالها واحد زميلي

مش هانتخب شفيق... مش هينفع...

هانتخب مرسي للأسف، ""لو"" الإخوان غيره لهجة الخطاب الزفت المتعجرفة بتاعتهم دي، ولو الإخوان تنازلوا عن استراتيجية الاستقطاب الطائفي... أنا هنتخب مرشح يتحايل عليا عشان أديله صوتي، مش مرشح بيقولي انت وصوتك في ستين داهية انت أصلا من غيري كان زمانك اتحط عليك. نقطة...

مذكرات طبيبة مصرية 1

امبارح عيان عندنا في القسم التمريض بيركبلو الدوا محطش الline في الكانيولا كويس فالدوا كلو وقع عالملاية بتاعه السرير, فالراجل اول ما شافنى بيقولي الممرض عمل كذا انا هشتكيه هو مكانش عارف يشرحلي اوي فانا مكنتش فاهمة الموضوع اصلا, المهم قلتلو طيب اشتكيهم حقك, فالراجل بيقولي انا اقولك وانتي اللي تشتكيهم هما مش التمريض دول تبعك؟ قلتله لأ حضرتك انا دكتورة والمسؤول عن التمريض رئيسة التمريض مش انا, فابتدى يزعق ويعلي في صوتو فقلتلو انت بتزعق ليه؟ مش مسؤوليتي اللي حصل روح اشتكر المهم على صوتو وقعد يتكلم كتير قلتلو طيب بما انك عليت صوتك انا مش هتكلم معاك وشوف مين هيسمعك, جه قريبو قاللي في ايه بس يا دكتورة معلش اصلو تعبان قلتلو لأ معلش تعبان واتعاطف معاه بس يتكلم بأدب ميزعقليش وانا معملتلوش حاجة.

المهم اتكلمنا شوية والراجل بيشتكي من المكان والنضافة وبيقولي دي بطانية يتغطى بيها قلتلو لأ ولا ده قسم يقعد فيه اصلا, فالراجل عجبو كلامي وبيقولي طيب ماتغيرو, قلتلو ماحنا لما جينا تغير وحبينا نعمل اضراب وقفتوا ضدنا, قاللي مااللي وصلنا انكوا بتعملوا الاضراب عشان مرتباتكوا مش عشانا, قلتلو احنا مش محتاجين مرتبات المستشفى اصلا انا لو عايزة فلوس هشتغل private الموضوع كلو عشان ميزانية وزارة الصحة تزيد من 3.5% ل 15%, احنا مش بنلاقي لا المكان ولا المناخ ولا الامكانيات اللي نشتغل بيها, احنا ماشيين بالمثل اللي بيقول الشاطرة تغزل برجل حمار, قعدت افهموا كم الفساد اللي موجود وان مش كل حاجة مسؤولية الدكتور واننا مظلومين اكتر منهم ومش مسؤولين عن تطوير المستشفيات واللي ليه عندنا المعاملة الحلوة والاهتمام وبصراحة نواب وحدتنا ملايكة بالنسبة للي بسمعو هنا. الراجل تعاطف معانا اوي وقاللي مانتو لازم تفهمونا احنا مش فاهمين.

الغرض من الحكاية دي حاجتين:

1- المريض المصري مش بيشوف قدامو في المنظومة الصحية كلها غير الدكتور, اي مشكلة تحصلوا يبقى الدكتور اللي يحلها!!! الناس مش فاهمين اننا لا حول لنا ولا قوة في المنظومة الخربانة دي, بجد محتاجين نفهمهم عشان لما بيفهموا بيتعاونوا معانا وبيرحمونا.

2-متسمحش لحد يعلي صوتوا عليك وتقبل بحجة انو عيان ومتعصب محدش يفرط في كرامتو, زي مابنعمل اللي علينا تجاههم لازم يحترمونا واللي مش هيحترمنا مش هنعمل زيو ونبهدلو بس هنوقفوا عند حدو بالادب.

وتظل الاجابة تونس

انا رأيي من الاول نرمي كتلة الاحزاب دي في الزبالة ونرتاح منهم, شوف الحرب الطاحنة بين التيارين الرئيسسين في مصر "اسلامي" والاخر "التيار المطالب بدولة مدنية علماني وليبرالي واشتراكي سبحان الله اليمين اتوحد مع اليسار" شوف هنا حوارهم عامل ازاي وفي تونس حوارهم عامل ازاي؟


هنا التياريين بيقصوا بعض ده يقول على ده كافر والتاني يرد انت متخلف ورجعي. في تونس الاغلبية في المجلس التأسيسي حزب ذو مرجعية اسلامية اختار رئيس للدولة علماني ومش اي علماني, طبعا دي في مصر من عجائب الدنيا السبع بس هما هناك عشان محترمين بيعرفوا يعني ايه ننحي المصالح الشخصية عشان مصلحة الدولة بس هنا في مصر متعلموش ده.


يارب اعيش واشوفهم محترمين وبجد عايزين مصلحة البلد
احنا محتاجين نهجر المعارضة بتاعنا كام سنة بره يمكن يتعلموا, مش شايفين ان كل المعارضين اللي من الخارج بيفهموا وبيعرفوا يتقبلوا الاخر؟ وكل المعارضة اللي من الداخل بتاكل في بعضها؟


يا جدعان المعارضة دي تربيه مبارك


كلهم فلول اصلا
تفكيرهم تفكير فلول اتربوا عالاختلاف وعدم احترام الاخر والمصلحة الشخصية بعيد عن مصلحة البلد


سبب تقدم تونس عننا مزيج من الانين, شعب مثقف + معندوش نخبة تييييييييييييييييييييييييييييييت


واخيرا احب اقول, فوضت امري اليك يارب


وحسبي الله ونعم الوكيل


المنصف المرزوقي كان معارض للنظام التونسي في الخارج وهو اول واحد دعا لمليونية في الشارع لخلع النظام, الاب الروحي للثورة بيكرموه رئيس

وهنا الاب الروحي للثورة بيشتموه ويشوهوه "البرادعي" وبالمناسبة هو بيتهته زي البرادعي بردو

تجربتي مع انتخابات 28 نوفمبر 2011...الايجابية حلوة

انهارده كان يوم لطيف made me proud of myself لجنتى لجنة الزيتون الحديثة الاعدادية بنات كنا ناويين ننزل بدري بس صحينا متأخر وعقبال ما فطرن وجهزنا روحنا على 12, اللجنة ابتدت الساعه 10:30 على كلام الناس هناك "مكنتش موجوده ساعتها والا كنت عملت محضر" واحنا عالباب ناس بيوزعوا دعايا انتخابيه نبهت ان يا جماعة اللي بتعملوه غلط seemed not caring فقلتلهم طيب انا هشتكى, دورت عالقاضي المسئول عن اللجنة وقلتله قاللي ده بره المدرسة من تبعي بس ممكن تصوريهم وتكتبي شكوة وائشرلك عليها.

روحت لجيش والشرطة الجيش قال مش تخصصي شوفي بتاع الماحث روحت لبتاع المباحث قاللي انتي عايزة تئذيهم ليه؟ خليكي قلبك ابيض زينا كده قلتله لأ انا انسانة مؤذية بتحب تئذي الناس :d بعت مخبر يمشيهم وروحت انتخبت.

خرجت وعديت عاللجنة اشوفهم تاني لقيتهم بيكتروا روحت مصوراهم كلهم ودخلت للقاضي كتت شكوى وائشر عليها وقاللي روحي للجنة العليا للانتخابات وحطي لصور على CD, اللطيف في الموضوع ان كل ما اروح لحد اشتكي يسألنى انتي مندوبة اي حزب او تبع حزب ايه؟ ارد اقول مفيش انا مواطنة مصرية Wanna make sure ان انتخابات بلدي نزيهة وبعدين انا دكتورة لو سكت على ده يقى ملومش عالناس الغلابة لما يشوفوا التزوير بعنيهم ويسكتوا.

المكهم حطيت الصور على CD ونزلت اوديهم محكمة شمال القاهرة زي ما القاضي قاللي روحت هناك قالولي لأ ده في مصر الجديدة شارع عبد العزيز فهمى امام الكلية الحربية, اتصلت برقم مستشار كان القاضي اداني اسمه قاللي ده في اللجنة العليا للانتخابات قالي لأ ده في دار القضاء العالي, اتصلت بحد اعرفه في 6 ابريل قالولي لأ ده في مصر الجديدة قلت خلاص يبقى على مصر الجديدة.

روحت هناك لقيت الدور اللي تحت اللجنة العليا في لجنة حقوقية لمتابعه احداث الانتخابات روحت داخلالهم قلت هما اضمن :D

الناس رحبت جدا وانبسطوا اوي ان الصور مبينه انصار المرشحين والدعايا اللي بيوزعوها.

انا مبسوطة اوي مع اني ضيعت اليوم كله في الموضوع ده بس عشان كنت امينة مع نفسي مسكتش عالغلط حتى ولو صغير, لو الكل عمل كده مش هنلاقي انتهاكات في انتخابات بلدنا

وادي الصور والشكوى :)

http://www.facebook.com/media/set/?set=a.10150495246451133.428652.655501132&type=1&l=c3f41e3754

عن الحوار بالعقل نتحدث....

من شوية عالقناة الاولى جابوا شوية شباب من التحرير واتكلموا معاهم

واحد اسمه عبد الله كان في الاستديو واتنين عالتليفون

كلهم بيتكلموا ان اللي بيحصل من مكاسب بسبب وجود الناس في التحرير مش عشان النظام قرر يبقى كويس

وانهم عايزين ضمانه وجدولة الاصلاحات عشان يقدروا يثقوا في الحكومة

وان اللي يضمنلهم ان مطالبهم تتنفذ هو حل مجلس الشعب فورااااااا والتحضير لانتخابات في ابريل وده وارد جدا الانتخابات اللي فاتت اتعملت في 14 يوم

لو الريس خد الخطوة دي الناس هناك هتثق انهم فعلا عايزين يصلحوا انما متطلبش منهم انهم يصدقوا ان البرلمان المزور هيغير الدستور ويخلوه كويس ويصلحوه!!!!! دي وجهة نظرهم

المذيعه قالت طيب يعني هتفضلوا قاعدين لحد ما المطالب تتحقق قالها اللي في ايده التنفيذ ينفذ بسرعه عشان الناس دي تمشي بسرعه

وكلامة منطقي

وبعدين فتنة ايه اللي حاصلة؟

ناس مع انه يمشي دلوقتي وناس مع انه يخلص مدته لو الطرفين محترمين يبقى فين المشكلة في اختلاف الاراء؟

اللي حصل هو ان البلطجية هما اللي اعتدوا عالمتظاهرين عشان يمشوهم بعد ما فشل النظام انه يمشيهم بالشرطة والجيش والحوار وكل حاجة

هل دي تبقى فتنة؟ فتنة بين مين؟ البلطجية والناس؟

ببساطة عايز الوضع يتحل وميبقاش في ضحايا اقبض عالبلطجية او بطل تسلطهم بسيطة يعني

الناس قعدت تلات واربعوخميس في الميدان ومصر كانت شغالة عادي جدااااااااا ومحدش عطل حد

اللي عطل البلد حظر التجول اللي اخده الحاكم العسكري مبارك مش اللي خده المتظاهرين!!!! يرفع الحظر والحياة هترجع طبيعية زي اللي حصل انهارده

كل حاجة بسيطة هو بس قعده الناس في التحرير مخليه منظر النظام وحش قدام العالم وضاغطه عليه وعشان هو نظام مضلل ومش عايز ينفذ حاجة فمش عايز الناس اللي وجعاله دماغه دي وعايزهم يمشوا فبيقلبوا عليهم الشعب ليس الا

لما نبرة التليفزيون المصري بقت موضوعية الى حد ما الناس بطلت تسخط عالمتظاهرين والحياة رجعت طبيعية

النظام هو اللي بوظها وهو اللي لازم يصلحوها المتظاهرين معملوش حاجة لحد دي ناس بتعبر عن رأيها

وبعدين هما مش في التحرير بس دول في التحرير واسكندرية والسويس والاسماعيلية والغربية والشرقية وكل محافظات مصر

المصريين هما اللي متربوش على تقبل ثقافة الاحتجاج ليس الا

هل حقا حواء زنانة؟

قاعده تانية مع النفس للتفكير في احوال البشر

Adam and Eve آدم وحواء

هل حواء زنانة؟

تعالوا نفكر بالمنطق

"ترتدي عبائة الحكمة_ انا اللي برتديها طبعا"

عارفين لما حد يبقى فاهمك لدرجة انه قاعد في دماغك؟

حافظك لدرجة تخنق

عايز يعملك كل حاجة وميتعبكيش

يعيش بدالك

ده بيخنق بيحسس ان حد عايش بدالي

someone is stealing my life

مساحة يتحرك فيها

احنا مش بنسمح للمساحة دي

احنا عايزين نبقى موجودين بنشاركهم النفس اللي بيتنفسوه

يمكن عشان احنا بنعرف نخلق لنفسنا المساحة دي في وجودهم

بس هما مبيعرفوش يخلقوها في وجودنا

لازم احنا من حين للآخر نبعد شوية

عشان نسيبلهم المساحة دي

فعلا آدم محتاج مساحة لنفسه شوية

هما محتاجين مساحة يحسوا فيهم انهم احرار

فتكين

وقت ما مش كل حاجة فيه نبقى فاهمينها كده

الشباب بيبقوا محتاجين مساحة يحسوا فيها انهم مش تحت الحصار من البنات

مساحة للحرية

مش لازم تبقى البنت عايشة جوه دماغه وفاهمة وعارفه عنه كل حاجة

ومعاه في كل خطوة بيعملها او بيخططلها حتى

مش عايزاه يقع ويبقى دايما صح بس هو عايز يقع ويجرب ويتعلم

مش عايز دايما حد متشعبط فيه

صح ولا ايه؟

عشان كده بتعتبرونا معشر البنات زنانات صح؟

المشكلة ان احنا كبنات بنعرف جدا نخلق المساحة واحنا شاركينكم في كل حاجة

بس انتوا لأ

وبعدين عندنا الاشراك ده بيقوي ال bond

وبما انهم واحد يبقوا لازم يبقوا روح واحده يعملوا كل حاجة مع بعض

متديلوش فرصة يتنفس تشاركه في كل حاجة حتى نفسه

عشان تقوي ال bond

بس انتوا لأ

وبعدين عندنا الاشراك ده بيقوي ال bond

وبما انهم واحد يبقوا لازم يبقوا روح واحده يعملوا كل حاجة مع بعض

متديلوش فرصة يتنفس تشاركه في كل حاجة حتى نفسه

عشان تقوي ال bond

حواء بتتعامل مع آدم انه نصها التاني وانهم واحد

ده غير ان حواء آدم بالنسبالها الفارس المغوار

الملك اللي هيتوجها ملكة على مملكته ويحمي هو المملكة دي ويقوم بكل الواجبات وميغلطش

هي لو غلطت هو هيصلحلها انما هو لما يغلط مين يصلحله؟

آدم كائن مثالي يقدر يعمل كل حاجة ويحل كل العقبات

وحواء ماهي الا كائن ضعيف يحتاج للحماية

وان قصر في حمايتها تشعر بالخطر

وانتوا عارفين الواحد لما يشعر بالخطر بقى بيتجنن ويبقى شرس

وتبدأ بمطالبته بحمايتها حتى من نفسها

دي مشكلة ال false believes

we always thing Adam is super hero not a human being

حتى المثقفات من حواء ال false believes دي جواهم وبيخلوهم يتصرفوا على اساسهم كتير

على النقيد في false believe تاني موجود

ان آدم طفل حواء هي امه

معرفش الاتنين موجودين مع بعض ازاي!!!!! وده يفسر ان الانسان ملئ بالمتناقضات

حواء مش مستوعبة انها المفروض تبقى جنب آدم تسنده مش فوقه تسحقه

we have to be supportive not pressuring

آدم هو مركز حياة حواء وهي عاوزاه تبقى هي مركز حياته

مش قادرين نستوعب اننا فعلا مركز حياتهم بس بطريقة اعم واشمل

يعني آدم لما يقعد جنبي فاكر كل تفصيله من حياتي وفاكر كل ذكرى ويسيب شغله ومنلاقيش ناكل ونأكل الاولاد

مش الماديات بس في مسؤوليات كتيرة اوي

مش معنى كده ان آدم ياخد كل المسؤوليات ويرمي حواء

يهتم بيها بردو بس لو نسى تفصيله تبقى تفكره بهدوء مش بشراسة

نديهم الفرصة ياخدوا وقتهم في اتخاذ القرار

مش لازم تبقى معاهم وهما بياخدوه ونطالبهم بالسرعة كمان وفي نفس الوقت القرار يطلع صح

حاسة اني دخلت الدنيا كلها في بعض وجبت حاجات من الشرق والغرب

بس الخلاصة انAdam needs a space

وآدم محتاج يفهم حواء عشان يقدر ظروفها وحواء محتاجة آدم يفهمها نفسه عشان تقدر ظروفه المختلفة عنه

يعني محتاجين نفهم بعض

سلام عشان ابتديت ادخل امريكا عاليونان

مصر هي امي بس هو اللي جوز امي

عزيزي جوز امي مصر,

تحية مش طيبة وبعد.......

مش عارفة اقولك يا عمي على اساس اني اللي يتجوز امي اقوله يا عمي بس ممكن اقولك عمى الدبب

مش ناوي تسيبنا بقى ربنا يكرمك

مستعده ابطل ادعي عليك وادعيلك تدخل الجنة كمان بس تفارقنا ربنا يعزك

امي زهقت منك مش طايقاك
لا طلب طلاق نافع ولا خلع نافع طيب نعمل ايه؟

نصبر على جارنا السو يايرحل ياتيجي مصيبة تشيلو؟

طيب واللي مش قادر يعمل ايه؟

خلاااااااااااااااااااااااااااااااااااااااااااااااا اااااااااااااااااااااااااااااااااص عمري 22 سنة طوارئ

مش كفاية حرام؟

وبعدين ابنك الغبي اللي اسمو داخلية ده بجد في منتهى الغباء

يعني بتقتلوا في الناس ودي من زمان معروفه بس في القسم مش في الشارع عيني عينك كده
لأ ومش عارفين تزوروا بيان اصغر عيل يكشفه؟

يا جوز امي نصيحة منى ليك ارمي ابنك داخلية ده هيوديك في داهية

ريحته فاحت وريحتك فاحت معاه

ده خلى الناس اللي ساكته وماشية جنب الحيط تتكلم

حيط ايه بقى ماهو دلوقتي ولادك بيدخلوا جوه الحيط ويقتلوا الناس

مبقاش في حاجة نافعه ولا امان موجود

طيب خليك زكي واسرقنا وخلينا نرضى زي زمان
انما تسرقنا وتاخد الرضا والامان كمان؟

كده كتير

مش هقول اكتر من ليك يوم ياظالم

قربت تخلينا نكره امنا بس هي مختارتكش في يوم هي اتغصبت عليك

لكي الله يا مصر

لكي الله يا أمي

Love is just a spark!!!!

"love is only the spark. but to make fire that warms ur soul both of u has to work on ur love, add wood and protect it from winds so it can blossom. otherwise that beautiful spark will fade out. love needs effort to be each other soul mate and partner"

لقيت الكلام ده في تعليق على مدونة احمد خالد توفيق

سبحان الله لسه كنت بتكلم في موضوع the spark
ده امبارح واول امبارح

كنت عايزة اكتب note
بس مكنتش عارفة ازاي!!!!

بس التعليق ده ألهمنى

خلينا في الأول نعرّف يعني ايه spark

spark is when two people meet the 1st time and from the first sight they have a long gazing and staring look they don't know why or when that happened but it just happened

تقريبا اللي الناس ممكن تفتكره حب من النظرة الاولى

في نظرتي هي مش حب هي مقدمة للحب

يعني شئ مبدأي للشعور بارتياح شخص ما ممكن يتطور لإعجاب ثم حب

that spark عندي كافية انها لو حصلتلي مع حد لو كلمنى هفكر فيه وابتدي اشوف اذا الموضوع ممكن يتطور لحب ولا لأ

الحب ده شئ بيبنوه اتنين زي شجرة كده عشان كده مش مقتنعه بمبدأ الحب من طرف واحد هو تعلق ممكن بس مش حب اكيد مفيش واحد لوحده هيقدر يروي الشجرة دي لازم حد يبادله نفس الشعور او يديه امل عشان الشعور ده يكبر

السؤال هنا

Is the spark something in love or it's nothing and it can just simply fade away is the spark alone enough to build love??

لسه الموضوع ليه كمالة محدش يكون فكرة عن اللي في دماغي لحد ما انزل الحلقة التانية

Too perfect to be loved

Too perfect to be loved

مثالية اكتر من اللازم كي تٌحب
او
مش بعرف اترجم من انجلش لعربي اوي فلو حد عنده ترجمه افضل من كده ياريت يقوللي عليها

المهم let's get into the point



الناس اللي اقرب للمثالية من وجهة نظر الناس وجودهم في الحياة بيحسس غيرهم انهم مش كويسين في الافلام الامريكاني كتير بنسمع المصطلح ده بيتقال you are too perfect to be loved للناس اللي حياتها مرتبة وبتحسب كل حاجة قبل ماتتعمل وبتتصرف صح

يعني لما هما يغلطوا ويشوفوا غيرهم مثالي ومبيغلطش زيهم وجوده قدامهم بيحسسهم اد ايه هما وحشين

تيجوا نحسبها بالمنطق

هل عدم وجود الشخص الكويس ده مش هيحسس الناس التانيين انهم وحشين

طيب تعالوا نسميهم عشان نرتاح

اللي بيقولوا عليه مثالي اسمه "*"
اللي مش بيحبوا المثالي وشايفين ان وجوده بيبين انهم وحشين اسمهم "# "

هل عدم وجود * في حياة # هيخليهم يبقوا كويسين يعني؟

يعني لو جماعة حرامية عايشين مع بعض مش هيحسوا انهم حرامية غير لما ييجي حد مش حرامي يعيش معاهم؟

هل احنا مش بنشوف الغلط غير لما نشوف الصح؟

اه ممكن بردو

بس فكرة اننا نشوف الغلط او منشوفوش ده لاينفي اننا بنعمله

يعني وجود * مش هو اللي بيخلي # وحشين لأ هو اللي بيبينلهم حقيقتهم

يعني * مهمين عشان يكشفوا للناس حقيقة نفسهم

ممكن نسميهم المراية اللي البشر بتشوف فيها نفسهم

هما مش مراية اوي يعني عشان actually

كل * بيبقى محتاج * تاني عشان يشوف فيه نفسه
يعني مفيش حد كله # او كله *

عشان احنا بشر تركيبتنا خير وشر محناش ملايكة كلنا خير او شياطين كلنا شر

مش مبرر اننا نشوف حد منظم واحنا مهملين اننا نكره الشخص المنظم ده عشان بيورينا اد ايه احنا مهملين بنظامه

عشان احنا بردو عندنا حاجة احسن منه بتبينله مدى النقص اللي عنده فيها كل مايشوفها عندنا

N.B: البشر بيكملوا بعض مش ضد بعض

ربنا خلقنا غير بعض عشان نكمل بعض مش نكره بعض

انا كده عرضت وجهة نضر # و اللي بيبص عالموضوع من فوق

نشوف بقى وجهة نظر حد من ال* او اللي الناس بتقول عليهم * رأيهم ايه

يمكن في الاول بيبقوا مبسوطين ومرتاحين بكده انهم مبيغلطوش كتير وبالتالي مبيندموش كتير

بس الناس دي بتفكر كتير اوي, كتير لدرجه مبيعرفوش يوقفوا مخهم وبيبقى عامل زي المكنة الزنانة اللي مش عايزة تقف_احساس وحش اوي على فكرة ان يبقى في مكنة زنانة شغالة 24 ساعه في دماغك

احيانا بيشتاقوا انهم يغلطوا زي كل البشر ويبطلوا جلد ذات شوية ماهو الغلط ليه متعة بردو والاستهتار ليه متعة تخيل واحد فقد القدرة انه يبقى مستهتر وهايف
حتى لو حاول يبقى كده مبيعرفش وكل اللي حواليه محسسينه انه كائن فضائي مش منهم_احساس بشع طبعا

تخيل الشخص او الشخصة دول بقى لما يحبوا حد والحد ده يبقى شايفهم too perfect to be loved


آن آن آنننننننننننن
موسيقى تصويرية

كده دخلنا في شغل الافلام والحب الضائع والحاجات الكتير اللي ضايعة

والناس اللي تقعد طول عمرها looking for Mr. and miss right


الصراع هنا بيبقى انهم بيتعاقبوا عشان هما كويسين
طيب الحل ايه؟

يبقوا مش كويسين يعني عشان يعجبوا؟
مش هيعرفوا
فقدوا القدرة على انهم يبقوا مش كويسين اصلا

طيب والحل؟

مش عارف
لو حد لقى حل يقوللي

يمكن هما من الاول محبوش صح
او اختاروا صح
مع العلم ان مغزى كلمة حب هنا مش يعني حد يتجوز حد لأ حب اصحاب حب أهل حب حبيب
في ناس من كتر ماهما صح اوي بيخنقوا اللي حواليهم واقرب الناس ليهم فعلا

يمكن الحل في تقبل الآخر

هما يتقبلوا غيرهم وغيرهم يتقبلهم ويبطلوا ينقدوا في بعض؟

ولا يدوروا عاللي زيهم ويعيشوا على جزيرة نائية _حلوة نائية دي_ ويشيدوا اليوتوبيا بتاعتهم هنك ويُريحوا ويستريحوا؟

يمكن

او يمكن الغلط اصلا في ال categorization

سواء اللي هما حاطوا نفسهم فيه او غيرهم حطهم فيه
no body is perfect that's for sure

and off course no body is too perfect to be loved


يمكن هما بس لسه ملقوش اللي يقدرهم ويقدروه
او يمكن مستعجلين

وبعدين الدنيا دي دٌنيا من الدونية يعني الكويس فيها صعب يرتاح

رأيي المفروض يستبيعوا ويختاروا الآخرة عشان الصراع ده هيفضل دايما موجود الدنيا ام الآخرة
ومعتقدش حد هيقدر يجمع بين الاتنين

والاهم من ده كل القناعة

ان الانسان يبقى قنوع باللي في ايده ويحمد ربنا عليه وميبصش لغيره لا بالتطلع باللي في ايده ولا بالقرف على حالة ميبصش لحد خالص كل واحد يخليه في نفسه احسن

وفي النهاية احب اقول ان كل اللي اتكتب ده شخبطة من مخلفات المكنة الزنانة اللي شغالة عندي

وعادي يا جماعة مش انا لوحدي اللي بخرف في ناس كتير بتخرف زيي حبيت اقولهم انهم بيخرفوا وانا معاهم :d


واخيرا تعرف ايه عن المنطق !!!!!!!
:D :D

N.B 2: اه وحاجة كمان

لكل اللي متضايق انه/انها بيتقالهم الكلمة دي انتوا مثاليين زياده عن اللزوم او too perfect to be loved


احب اقولكم ردوا وقولوا للي بيقولكم كده and you are too fool to be tolerated

الفتنة الطائفية في نجع حمادي....من السبب؟

نظرة على ما حدث في نجع حمادي واللي لو اتصبر عليه هيحصل في كذا مكان بعد كده

تعالو نشوف اللي اتكتب في الجرائد واتقال في التليفزيون عن الحادث

اولا

اعتداء على مطرانية نجع حمادي ومقتل واصابة اقباط (على اساس انهم مش مصريين يعني)

قامت الاجهزة الامنية صباح الجمعة بضبط المتهمين الثلاثة في حادث إطلاق النار على مواطنين مسيحيين في مدينة نجع حمادي، بعد أن قاموا بتسليم أنفسهم للامن اثر تضييق الامن الخناق عليهم وحصارهم، فيما بدأت النيابة العامة بمباشرة التحقيق مع المتهمين لمعرفة ملابسات الحادث.

والمتهمون في الحادث، الذي أسفر عن مصرع 7 أشخاص بينهم 6 أقباط وجندي مصري وإصابة 9 آخرين، هم محمد أحمد حسن الكومى، وقرشى أبو الحجاج محمد على، وهنداوى السيد محمد حسن.

وكانت الاجهزة الأمنية قد حددت هوية مرتكبي الحادث مساء الخميس ومحاصرتهم في منطقة زراعات بين مركزي فرشوط ونجع حمادي، وإغلاق طريق الهروب المؤدى إلى الجبل الغربى وتضييق الخناق على المتهمين،فيما تمكن الامن من ضبط السيارة التى استخدمها الجناة فى ارتكاب الحادث.

وفي وقت سابق الجمعة، وصل المستشار عبد المجيد محمود النائب العام المصري لمحافظة قنا لإجراء معاينة ميدانية لموقع حادث، وإستعراض النتائج الاولية التي أسفرت عنها التحقيقات.

وكان مجدي يعقوب محافظ قنا قد أعلن - فى اتصال هاتفى مع التليفزيون المصري مساء الخميس ـ أن احد احتمالات الحادث يعود الى واقعة سابقة فى نوفمبر فى مدينة فرشوط بالمحافظة قنا، حيث وقع أحداث شغب شملت حرق متاجر تخص اقارب الشاب جرجس جرجس المتهم بهتك عرض الفتاة المسلمة القاصر واسمها يسرا "12 عاما" في المدينة.

المصدر

http://www.saveegyptfront.org/news/?c=200&a=26922



خدوا بالكم من اللي بالأحمر
يعني الموضوع موضوع تار مش موضوع مسيحي ولا مسلم

شوفوا بقى رد فعل الغباء بالغباء

اندلعت من جديد مساء اليوم، الجمعة، الاشتباكات بين الأقباط والمسلمين بمدينة نجع حمادى بقنا عندما تعدى الأقباط على المصلين أثناء خروجهم من مسجد "الست حميدة" بعد أداء صلاة العشاء، وذلك عقب انتشار أنباء عن وفاة اثنين من الضحايا المصابين فى الحادث الأخير.
ونزل المئات من المسلمين والأقباط الشوارع، خاصة فى شارعى التحرير والجنينة، مما أدى إلى إصابة شخصين من المسلمين وتم نقلهما لمستشفى حورس الخاصة، كما قام المسلمون بإشعال النار فى محل للخمور يمتلكه قبطى.
ومن جانبه أغلق الأمن كافة منافذ الدخول للمدينة وتواجد بكثافة فى الشوارع.

المصدر

http://www.saveegyptfront.org/news/?c=200&a=26945


نفسي افهم مبيقولوش الحقيقة ليه؟
ليه الخبر ميتذاعش صح ان مصريين قتلوا واصابوا مصريين زيهم عشان حادثة تار!!!!!

ليه نقسمها ان مسلم اصاب مسيحي وبعدين مسيحي اصاب مسلم ردا على الاصابات الاولى؟

مين اللي قسمنا كده؟

يعني هما المسلمسن مش يعتدوا على مسلمين والمسيحيين بيعتدوا على مسيحيين؟
ماهو كله بيعتدي على كله وكله واكل حق كله اشمعنا هنا بيقسموها يعني؟

ماحنا كلنا ضايقين الهم سوا والذل سوا والغلا والكوا سوا اشمعنى هنا بنتفرق؟

مين اللي حط فكرة الفركة دي فينا اصلا؟

مين اللي قسمنا دولتين؟

اتفرجوا فرقتنا عملت فينا ايه



نيابة شمال سوهاج تستمع لأقوال المصابين في حادث نجع حمادى.. والتحقيق مع المتهمين خلال ساعات .. وأقباط مصريون يرسلون مذكرة للأمم المتحدة لتشكيل لجنة تقصي حقائق دولية




وزير خارجية إيطاليا يحرض على التدخل الدولي في الشئون الداخلية المصرية ويصف ما يسميه بالعنف ضد أقباط مصر بأنه يثير الرعب !!.. أقباط مصر ليسوا في حاجة لتدخل أحد .. وعليك الاهتمام بالمافيا عندكم بدلا من مصر!!



مش هقول غير حسبي الله ونعم الوكيل عالاغبيا اللي لسه بياخدوا بالتار وكإننا في غابة وايه حبكت يوم العيد

وعالاغبيا اللي اكثر غباء اللي يسموا بالاعلام ورجال الأمن اللي بيخبوا الحقائق عن الناس

وعن اللي كان السبب في فرقتنا


تحليل للموقف ولعقليات الناس

الاصل حادثة اغتصاب طفلة

البديهي ان اهلها ياخدوا بالتار من الجاني وعيلته مش يتحول التار لعمليه عشوائية ويروحوا كنيسة يقتلوا الحارس "المسلم" واللي يقدروا عليه من الناس هناك

طيب ليه وصل الامر لكده؟

ببساطة الموضوع لم يتم التعامل معاه على اساس ان واحد اغتصب واحده

لأ ده الموضوع تحول من فلان هتك عرض فلانة ان الطائفة الفلانية هتكوا عرض الطائفة الفلانية

زي ماتشات الاهلي والزمالك كده مش الفريق الفلاني كسب الفريق الفلاني لأ ده الموضوع تحول الي صراع مشجعين ومناصرين مش ماتش كورة

الازمة تحولك الى الحقونا ياناس المسيحيين الوحشين هتكوا عرض بناتنا المسلمات
اذن فيقع عليهم العقاب
يبقى نروع على كنيسة ننكد على اللي جابوهم يوم العيد

والطرف التاني ميسكتش
وميروحش ياخد تاره من الجناة بردو ازااااااااااااااااااااااي؟ ودي تيجي

يتحول الموضوع من فلان قتل اخويا ان المسلمين الوحشين بيقتلوا في المسيحيين ويدبحوهم اذن وجب على كل مسيحي حمل لواء الدفاع عن الدين

يبقى نروح عند المسجد ننكد عاللي جابوهم بعد صلاة الجمعة

على رأي السادات غسيل مواطن نقط على غسيل مواطن

السؤال هنا

ليه الناس بتحب التحزبات وبتحب يكون ليها عدو؟

هل احنا كمصريين فقدنا معرفه العدو لينا؟ فبندور على عدو تاني نحاربه؟

هل مصر على شفا حرب اهلية؟

سؤال يطرح نفسه

لو حللتوا الموضوع بحيادية شوية هتعرفوا ان المد الثقافي اللي جالنا من الخليج ضرنا مأفدناش
هناك المجتمع كله زي بعضه معندهمش اختلاف فبالتالي معندهمش ثقافة الاختلاف زي هنا

مصر فيها مسجد وكنيسة ومعبد يهودي حتى قبل عدوا 67 كانوا اليهود عايشين في مصر عادي جدا لحد ماتم تهجيرهم وطبعا العدوان الاسرائيلي وولاء معظمهم لاسرائيل خلى في عداء بين المصريين واليهود (بردو عشان احنا شعب بيعمم)

لما دخل الفكر الثقافي الخليجي اللي بيستغرب من وجود كنيسة او مسيحيين على الارض (عشان هما بلدهم كلها مسلمين متعاملوش مع مسيحيين اصلا ولا متعودين ان يكون في كنيسة في بلدهم والمسيحي عندهم ضيف مش صاحب بلد مش زي عندنا هنا المسيحيين والمسلمين اصحاب بلد فعلا)
هو ده اللي ضرنا

لما تلاقي البلد اتقسمت اتنين

المسلمين بيتعاملوا كأصحاب بلد والمسيحيين ضيوف عندهم

والمسيحيين تقوقعوا على نفسهم وبقوا يتعاملوا كأصحاب ارض تم احتلال ارضهم من قبل المسلمين ولجئوا لمجتمهم السري المنغلق كأنهم هيعملوا جيش تحرير كمان شوية
حاسة ان ممكن جماعه تطلب الحكم الزاتي للمسيحيين في مصر!!!! وكإننا اصبحنا بلد اسلامي يعيش فيه بلد مسيحي تاني يسمى بشعب الكنيسة!!!!!

مين اللي عمل كده الطرفين

مكرم عبيد اللي كان زعيم للأمة مع سعد زغلول مسيحي

ليه دلوقتي مفيش قيادات مسيحية في البلد؟

اكيد مش هما من نفسهم انسحبوا وانغلقوا على نفسهم
كان في ايد من بره بتحرض الطرفين على بعض وتحط في دماغ المسلمين ان المسيحيين ضيوف وتحط في دماغ المسيحيين ان المسلمين محتليين غاصبين وتكبر الفكرة في دماغ الناس ويتعايش جيل بالكامل كده!!!!

هو ده اللي بيسبب الاحتقان في بلدنا

ليه اي قضية جنائية تحصل في مصر بين مسلم ومسلم او مسيحي ومسيحي تبقى قضية جنائية عادية

انما خناقة بين عيل مسلم وعيل مسيحي تبقى قضية امن دولة!!!!!

هل الدولة عاجبها ان المصريين بياكلوا في بعض؟

ايه اللي يخلي شيخ الازهر والبابا شنوده يطلعوا يدينوا اي خناقة بين اتنين مواطنين مصريين لمجرد ان واحد منهم مسيحي والاخر مسلم؟ هل بيطلعوا يدينوا مذابح التار في الصعيد, ولا حادثة العبارة, ولا سفاح المعادي, ولا التوربيني اللي قتل فوق ال70 طفل؟

هل تراجع دور قياداتنا الدينية لهذا الحد؟ ان بقى كل دورهم يشجبوا ويستنكروا غسيل مواطن اللي نقط على غسيل مواطن؟

هل هما لا سمع الله سذّج مش فاهمين؟ ولا في اسباب وترسبات خفية وفعلا دولة داخل دولة وتدخلات خاريجة بتتحكم في الموضوع ومخليه كله بيتعامل بحذر مع كله؟

Super Neo

كل واحد فينا جواه ما يؤهله انه يكون سوبر بطريقة او بأخرى

مش لازم اكون بعرف اطير او عندي قوة خارقة للعادة عشان ابقى سوبر

كلمة سوبر يعني انا عندي قدرة معينة اكبر من اللي عند الناس العادية بس مش لازم تبقى خارقة يعني ممكن تبقى حاجة في متناول الجميع بس اعلي القدرة دي عندي اكتر بحيث احظى بقدر أكبر منها من اي انسان تاني عادي

الموضوع ده بفكر فيه بقالي فترة بس في عوامل طلعتها في دماغي وعجلت اني اخد خطوة وانفذه

أولهم عمر..........عارفين لما تحبوا حد اوي اوي لدرجة ان الحب ده يكفي العالم كله وكل شعور الغضب من اي انسان في الدنيا يتحول لطاقة حب كبيرة؟ عمر عملي كده

فيلم signs اللي بعتهولي مهند
الفيلم ده هو اللي خلاني اخد الخطوة عشان عرفت انه بيتجيلنا فرصة واحده ممكن متتكررش تاني ولازم نستغلها ومينفعش نأجل عشان مش ضامنين نعيش عشان نكمل اللي كنا ناويين نعمله



مشكلة كده كانت حصلت من فترة فتحت موضوع قديييييييييييييم كنت تهيألي اني قفلته بس لما اتفتح في الاول اتضايقت وبعدين ارتحت الى حد ما عشان سويت فايل كان متعلق وانا مش بحب الفايلات المتعلقة simply معنديش رفوف اعلق عليها لازم كل حاجة يبقى متحدد مكانها

المهم

المقدرة اللي قررت انها تخليني سوبر هي: السماح

ايوة السماح

عايزة ابقى انسانه متسامحة

بصراحة مكنتش كده انا كنت بمثل على نفسي اني كده

انا كنت شخصية سوداوية اوي مش بنسى لحد اي حاجة وبعدين حسيت اني كده بتعب نفسي عالفاضي اصلا حياتنا اقصر من اننا نضيعها في مشاحنات وخلافات على حاجات هبلة مهما كبرت في نظرنا فهي تافهة بردو

ربنا بيغفر للناس الذنوب الكبيرة والصغيرة ومهما عظمت وبلغت مابين السماوات والارض ليه احنا منسامحش؟

عمرنا ماهنقدر نرجع الزمن لورا عشان نمنع اللي حصلنا من أذى او جرح بس ممكن ناخد precautions انه ميحصلش تاني

مش لازم نقاطع الناس اللي جرحونا احنا في الاول والاخر مسلمين زي بعض ومش اعداء بس ممكن نبقى حذرين منهم ونديهم فرصة يصلحوا الغلط اللي غلطوه

مفيش حد فين عمره ماغلط بتفاوت الدرجات بس كلنا غلطنا فيها ايه لما ندي لنفسنا فرصة تانية

عالاقل الواحد ميبقاش في ذكرى وحشة في حياته لما يدي الناس اللي جرحوه فرصة تانية لما يفتكرهم هيبقى مبسوط مش متضايق ويمكن علاقتهم تبقى اقوى من الاول لما يتخطوا الازمة وده حصل معايا فعلا قبل كده

مش لازم نستنى مصيبة تحصل عشان نقدر نتجمع ونسامح

مش لازم نضيع من عمرنا سنين عشان نفهم ان اي شئ تافه وممكن تخطيه

مش لازم نموت واحنا ندمانين اننا مصلحناش علاقاتنا مع الناس اللي كنا بنحبهم لمجرد انهم غلطوا فينا

مش لازم نروح نحج عشان نرجع قلوبنا مغسولة من الغضب اللي فيها

ماتيجوا نعمل حملة لغسل القلوب واحنا داخلين على ايام مفترجة والعشرة الاوائل من ذي الحجة

تيجوا نغسل قلوبنا كإننا حجينا؟

تيجوا ندي فرصة تانية لكل الناس اللي زعلانين منهم او في بينا وبينهم سوء تفاهم؟

محدش قال اننا ننسلى ونمحي الحرج في لحظة ونرجع زي زمان بس عالاقل ندي فرصة نسمع بعض ونحاول نحل المشكلة اللي حصلت او عالاقل نفتح الباب للي عايز يصلح غلطته

انا بأعلن من هنا اني مستعده افتح الباب لأي حد غلط فيا يصلح اللي عمله

وبعتذر لأي حد غلطت فيه ولو بكلمه في ساعه هزار

وبقول مش هتعنت وهقبل الصلح

حتى لو الموضوع كان صعب اوي اوي هنصلي جماعه مفيش ناس بيتجمعوا بين ايد ربنا وحاجة تقدر تفرقهم

هنصلي وندعي ربنا يفرجها علينا

هنقرأ قرآن سوا

هنعمل المستحيل عشان نصفي القلوب

اعتقد ان العلاقات الانسانية تستحق العناء

ولو عملت كل ده وبردو اللي جرح مش عايز يصلح يبقى عالاقل عملت اللي عليا لأخر نفس ومش هلوم نفسي اني صديت حد ا مدتش حد فرصة

هبقى راضية عن نفسي

واعتقد ان الرضا عن النفس يستحق العناء

نفسي يبقى عندي تسامح الرسول عليه الصلاة والسلام لقوم أذوه وطردوه وقالهم وهو في موضع قوة "اذهبوا فأنتم الطلقاء" بيتهيألي هي دي السنن الأولى بإتباعها

عارفة ان الشيطان مش هيسيبني في حالي وهيحاول يحبط من عزيمتي بس هقاومه وهحاول والاهم هستعين بربنا عليه

ادعولي اقدر احقق اللي بتمناه وابقى Super Neo

N.B 1: بقالي فترة نفسي اخد الخطوة دي بس كتير كانوا بيحبطوني وبيقولوا الناس هتستغل ده وتعتبرك هبلة بقولهم من هنا في فرق بين الطيبة والسذاجة

وبعدين انا كده مرتاحة لو بقيت غير كده i'll feel me is not me
عشان حتى لما كنت بحاول ابقى سوداوية مكنتش بعرف اكمل وده كان بيحسسني بالضعف اني مش عارفة اثبت على موقفي ومهند كان بيقولي يا متقلبة الميزاج :((

كده احسن اثبت على موقف يريحنى ويريح اللي حواليا

N.B 2:
لو حد لقاني بتراجع عن الكلام اللي فوق ده في فترة ما يديني على دماغي

الصراع المرير

اجلس مسترخية عالفوتية محاولة الراحة او الاستغراق في النوم

لا استطيع ان انام أشعر بألم شديد بداخلي

أشعر بال Antigen-Antibody reaction بداخلي

كأني آراه أمامي مباشرة

ذلك الوحش اللذي يلتهم جسدي من الداخل

أريد أن أصرخ

مهلا

لا أستطيع الصراخ

حتى الصراخ فقدت القدرة عليه؟ حتى انني لا اعرف ان كنت استطيع الصراخ يوما!!

أكتفي بالدموع عسى أن تخفف عنى ما بي

أندي صديقي العزيز جالس أمامي

نصحنى بأخذ نفس عميق بهدوء حتى أهدأ

مهلا

فقد اخذت النفس العميق ولكنه قد انحبس بداخلي

إنه لا يخرج

ما الذي يحدث

يا إلهي اغثني

أندي: أفيقي نويلا ولا تستسلمي it's just a panic attack

أصمدي ولا تستسلمي كعادتك

أني أغرق





أغرق








أغرق

لا أستطيع الصمود

أندي: لا بل تستطيعي لا تجعلي الاحزان بداخلك تتغلب عليكي, ألا تستحق حياتك الحفاظ عليها, أهي بخسة الثمن عندك حتى تستسلمي لأحزان انسان لا يأبه بكي؟

نويلا تحاول الهدوء والصمود ثم يعود التنفس طبيعيا مرة أخرى

ولكن الألم مازال مستمرا

صديقي الأخر بالغرفة المجاورة

هاري الخائن

نعم الخائن

فقد خانني عندما تخلى عني وتركنى وحدي وسط الصراع للوصول للحقيقة

فقد كان يملكها ولكنه آثر الصمت والكتمان

وها هو الآن عائد يريد الصفح

لماذا لا استطيع الغفران؟

أليس هذا ما أردت دائما؟ الصفح والغفران وراحة البال؟

أليس هذا ما أنادي به دائما أم فقط اتشدق بعبارات وشعارات ولا انفذ منها شئ؟

مجرد التفكير فيما افعله يثير اشمئزاذي

لماذا الآن أريد الانتقام منه وتعذيبه؟

لماذا انتظر حدوث مصيبة حتى استطيع الصفح عنه

ولماذا هو انتظر حدوث مصيبة مرضى حتى جاء ليطلب الصفح؟

أصمتي أيها الغبية لاينا وارجعي لجحرك مرة اخرى ولا تحاولي تقسية قلبي عليه فقد كان صديقا وفيا فقط سمح لبعض الاشرار بالتفريق بيننا وهو الآن نادم , كلنا نرتكب الحماقات ونندم فقط ارتكبت الحماقة الكبرى عندنا انتظرت سنة كاملة لأصارحة بما صار أيضا

الحماقة الكبرى لأنك لم تصارحيه؟ وماذا فعل هو قبلك هل صارحك بأسباب تصرفاته الحمقاء؟ ألم تكن هذي حماقة كبرى أيضا

نعم كانت حماقة ايها الشريرة ولكن قد حان وقت الصفح الآن فحياتنا لا تتسع للمشاكل والمؤامرات دعينا نخطف بعض الوقت للإسترخاء والاستمتاع

الآن وضحت الصورة

لم يكن مابداخلي Antigen-Antibody reaction يضيق نفسي

بل كان نويلا-هاري reaction ضاق صدري من احتماله

Enooooooooooooooooooooooooooooooooooooooooooough

pastaaaaaaaaaaaaaaaaaaaaaaaaaaaaaaaaaaaaaaaaaaaaa

بيكفى بئى

اعتقد ان هذا يكفى وقد حان وقت الراحة